|
II. IRUDIA
EUJENIO ETA KRISTOBAL
Kristobal azalduko da, eta egun on eman ondoren geldituko da ate ondoan, karrikara begira.
Kristobal
Egun on, Eujenio.
Eujenio
Hona zetorrek! Jar nadin lanean... Baxoerdiaren ordez har dezadan neskazaharraren zapata. (Eskuan hartuaz.) Zatoz aingerutxoen oin polita!
Kristobal
(Lehen bezala ate ondotik.) Egun on.
Eujenio
Egun on. (Mailuaren ordez, hartu eta hasiko da zapatarekin berarekin harria joaz.) Zer ari naiz ni?... lehen gaizki bazegoen, orain okerrago jarri dut... baina zer egiten du gizon horrek hor?
Kristobal
(Lehen bezala.) Egun on, Eujenio.
Eujenio
(Indar handiarekin.) Baita berorri ere. Egun on!!
Kristobal
(Sartuko da barrez eta oraindik karrikarantz begira.) Egun on, Eujenio. (Eujeniok begiratuko dio, baina ez dio erantzungo.) Egun on, Eujenio.
Eujenio
Hemezortzi bider erantzun diot.
Kristobal
Niri?... noiz?
Eujenio
Orain... kikilibiotan hasi zela uste nuen ate ondotik.
Kristobal
Bai, presisamente horretarakoxe gogoa ekarri dut. (Bat-batean haserretuaz.) Ordubete behar izan dut hona iristeko.
Eujenio
Sinisten dut, hemengo antzera ibili bada.
Kristobal
Bai, bide guztian honela etorri naiz... (Herren eginaz)
Eujenio
Kikilibiotan?
Kristobal
Ez, zuregatik txingoka... zer jarri didazu honen barrenean? (Soineko bota erakutsiaz.)
Eujenio
Zera, bost durokoren bat.
Kristobal
Bost ez ezik hogei ere hartzeko gaian nago. Presisamente hemen dakartzat zor dizkidazun lau hilabeteko errenten txartelak.
Eujenio
Gorde bitza ondo, galdu gabetarik, horrenbeste balio duten paperak.
Kristobal
Noiz eman behar didazu dirua?
Eujenio
Ahal dudanean.
Kristobal
Noiz izango da egun hori?
Eujenio
Erraza da asmatzen... Sorgina naizela uste al du etorkizunaren berri jakiteko?
Kristobal
Zureak gehiago?... Airean joan behar duzu denda honetatik, bai! (Lurrean ostiko handi bat joko du eta berehala egingo du antsia.) Ai!!... sartu zait hesteetaraino!
Eujenio
Nire dirua?
Kristobal
Zure... demonioa... ai! ai!...
Eujenio
Baina zer du?
Kristobal
Atera iezadazu agudo, atera iezadazu; baina poliki. (Eseri eta bota erakutsiaz.)
Eujenio
Iltzeren bat al dauka?
Kristobal
Iltzea edo eztena ez dakit, baina gutxienaz honenbestekoa bada. (Behatza bezain handia.)
Eujenio
Hori maiz gertatzen da... eta horrengatik horrenbeste zalaparta?
Kristobal
Zabiltza agudo, kaikua. (Eujenio tenkaka hasiko da baina berehala geldiaraziko du.) Zaude, zaude, galtzerdia trabatua dago eta puskatuko didazu. (Askatuko du barrengo galtza zuria, kenduaz zazpi edo zortzi alditan bildua daukan lokarria.) Ea orain galtzerdi eta guzti ateratzen didazun... ai!... poliki! ai! ai!
Eujenio
(Atereaz batean bota eta galtzerdia.) Bapo! Hona hemen lanperna!
Kristobal
Nire oin gaixoa... zer dauka?
Eujenio
Hutsa, orratzaren burua adinako iltze muturra.
Kristobal
Atera iezaiozu ondo. (Jantziko du galtzerdia eta joango da ate ondora.)
Eujenio
Zer ote du hor horrek? Beste maizterren baten zain ote dago dirua eskatzeko? Gizajoak zoru-erdi hau ez ezik beste bi ere urratuko ditu nireak hartu orduko.
Kristobal
Atera al diozu ondo?
Eujenio
Bai, har beza.
Kristobal
Eujenio, mesede bat egin behar didazu.
Eujenio
Nahi duen guztia, dirua ematea ez bada.
Kristobal
Tori eskutitz hau, eta eraman ezazu aurreko etxeko bigarren bizitzara. Galde ezazu Rosita Sudurpolitenekozaz eta eman iezaiozu berari, esanaz, erantzupena eguerdirako nahi nukeela eta... zerori joango zarela bila... ez da hala?
Eujenio
Bai, bai... beste ezer?
Kristobal
Ez, hori ondo egiten badidazu barkatuko dizut...
Eujenio
Etxe-errenta?
Kristobal
Ez, lehenagoko gaizki esanak, eta emango dizut errentaren alde gorde dudan zoru-erdi hauen dirua.
Eujenio
Eskerrik asko, berehala emango balit, zergatik... (Zintzurrari helduaz.)
Kristobal
Orain patrikan ez daukat; baina ekarriko dizut berehala, etxera noa eta diru bila, hamabostekoa, langileei emateko.
Eujenio
Bai, diru gauza horietan zenbat eta lehenago hobe.
Kristobal
Banoa bada, baina ea taxuz egiten didazun eskutitz horren tratua.
Eujenio
Laga niri, ondo ezagutzen dut. Sudurpoliteneko Arroxa.
Kristobal
Arroxa ez, Roxita. (Irtenaz.) Roxita... Roxita...
|
