|
Ramon Illarramendi
Andre Joakina eta Prantxiska
Andre Joakina: Baina Prantxiska, horrelakoa izan behar al duzu beti; ez duzu ikusten mundu guztiak barre egiten dizula?
Prantxiska: Mundu guztiak?... Berorrek ez du askorik egiten ba, kopeta argia jartzen dit behinik behin.
Andre Joakina: Nola nahi duzu nik barre egitea, eman dizkidazun tratuekin. Baditut beti etxean kontatzaileak hau edo hura egin duzula norbaitekin, eta txorakeriazko kontuak beti zeure burua umekeriarik handienean darabilzu; eta ni, asko penatzen naiz, batez ere zure ama tristeagatik, nire gaztetako lagunik maiteena; eta... herriko neskatxarik argiena zen. Bada saiatu zaitez zu ere amaren pausoak berdintzera.
Prantxiska: Bai premia ederra dauka, etxekoandrea.
Andre Joakina: Zergatik edo zeinek?
Prantxiska: Nire amak; ez al daki zer trinki-trankoa egiten duen hanka batetik?
Andre Joakina: Bai, festetan txirristatu zelako.
Prantxiska: Ez, andrea, hanka bat okertua duelako.
Andre Joakina: Horrengatik bada, saiatu behar duzu, ama dohakabe tristeari ez deskusturik ematera, eta laguntzera bere lanbide penagarri hartan.
|
