|
Ramon Illarramendi
|
Hogeita Hamargarren Irudia
|
Lehengoak eta Tomax Iñaxio (hau sartzen da zorroztarri bat, igitai bat eta soka besapetik arrastaka duela eta patrikan dultzaina). Soka muturra hartzen du Bonipaxiok mahai azpitik.
Bonipaxio: Zein da hau? Gobernadorea?
Andre Joakina: Gizona, azaldu al zara?
Tomax Iñaxio: Azaldu?... ez dakit azaldu baina, larrutu behintzat bai.
Andre Joakina: Bat edo batek eman dizkio epelak. Nondik larrutu zaituzte?
Tomax Iñaxio: (Eskuekin patrika erakutsiaz) Hemendik
Andre Joakina: Baina non edo nola?
Tomax Iñaxio: Non? "Janchi" edo... zerbait horrelako izeneko denda bat zen. Ez zen tontoa ez izen hori jarri ziona. Niri behinik behin iatxi didate enplastu ederra! Gauza franko erosi ere egin ditut baina... Hara; honoko soka hau, igitaia eta zorroztarria eta beste honoko (patrikatik atereaz) dultzaina hau, zenbat kosta direla uste duzue?
Andre Joakina: Gizona, utz iezaiozu kosteari. Benardo gizajoa han da zure bila joana, dena larritua.
Tomax Iñaxio: Larritua?... ni behinik behin gutxi estutzen naiz horrekin, gehiago estutzen naute nire bi gurdi pirril haiek. Bart arratsean ez dizkiot errazki kendu gure atsoari eta...
|
