 |
|
|
|
|
Segundo Kalonje
Gaur aiña eskale...
1
Donosti ontan ere gaur aiña eskale,
bestek emandakotik jan da edan zale.
Abiatzen bazera iñoiz kalez kale,
ikusiko dituzu makiña bat ale.
|
2
Ez dizute esango alperrak diranik,
alaxe ote diran irudipena nik.
Lotsagabe ausartak seitik bost izanik,
oieri ematea ez det beste penik.
|
3
Eliz aurrean ere eska eta eska,
agure eta atso, mutil edo neska.
Jarriko dizkitzute besoak trabeska,
nor errukituko dan or daude ameska.
|
4
Zenbat ijito-mota eskaka ari dan,
sortzen ez dago errez danentzat segiran.
Langilleak alperra asko dauka jiran,
gaiñera nork daki noiz gutxituko diran?
|
5
Eskale gutxi-gutxi ez degu ikusten,
ari dira oitura gaiztoak ikasten.
Ezpadute bizio trakets ori uzten,
ia laister labanaz larrutzen gaituzten.
|
6
Gaur entzuten deguna palta dala lana,
ori ere urritu len geiegi zana.
Nundik osatuko da guztientzat jana?
Nabarmenena dabil lotsik ez daukana.
|
7
Emaleak badauzka makiña bat ezten,
artzailleak pakean ez baidio uzten.
Emen zer gertatzen dan ez al da ikusten?
Emale piñik ez da iñoiz aberasten.
|
8
Ni ez nai gezurretan ariko iñori,
egi galanta dala noski badirudi.
Beti eska ta eska lagun urkoari,
besterena artzeko maitasuna lodi.
|
9
Eskale gaixo oiek ezin zaizkit aztu.
Jainkoarekin ere ibili nai justu.
Guretzako badago makiña bat gastu,
esku zabala dana ezin aberastu.
|
10
Mundua zuzentzeko dabillen ainbat itz,
otar bat egiteko amar milla zumitz.
Artzaille dagon dana emalea balitz,
nik ere obe nuke eskalea banintz.
|
11
Gu gera emaleak daukagun pixkatik,
aterako badegu anima kezkatik.
Lau aixa tranposoak badaude bostetik,
nik ez det bizitzerik izandu esketik.
|
12
Keja jendeak emen badauka naikoa,
beartsuenak ere nai degu goikoa.
Lana eskatu baiña neke gabekoa.
Ortik nun izango da? Or dago kakoa.
|
13
Goiko mailla nai degu lan gutxi egiñez,
nola artu liteke orrenbeste laiñez?
Ontziak betetzean egiten du gaiñez,
len nola bizitzen zan gaur askok jakiñ ez.
|
Leenengo sei bertsoak: El Diario Vasco, 1983-X-12. Gaiñontzekoak: S. Kalonjeren esku-idazkietatik
|
| |
 |
 |
|
|
|
 |
