|
Gregorio Mujika. Utzi beharko!
II
Lino eta Luis
Lino.- Entzun al duk?
Luis.- Bai, motel.
Lino.- Guk nahi duguna iristeko, gaurko egun hau bezain egokirik ez zaiguk etorriko.
Luis.- Zer? Lantegia guri ematea?
Lino.- Bai ba. Berak nahi duna esango dik, baina hau langintza ona duk, motel. Honetan asko irabazten duk. Horrek ez; zital ernegatu bat duk-eta... Gu egingo bagina gela honen jabe...
Luis.- Egingo gaituk, Lino.
Lino.- Esan al diek mutil haiei?
Luis.- Bai.
Lino.- Eta zer? Ez al ditek etorri nahi?
Luis.- Bai Gizona. Pozik zeudek etortzeko, baina...
Lino.- Zer baina?
Luis.- Beldur naizela zerbait igarriko ote dion.
Lino.- Nagusiak ez dizkik ezagutzen.
Luis.- Halaxe duk.
Lino.- Eta ezagutuko balitu ere zer? Ezin al dituk, ba, horiek ere etorri erretratatzera beste edozein bezalaxe?
Luis.- Hori bai.
Lino.- Ikusiko duk; guzia ondo irtengo zaiguk Hoa mutil horiengana, eta berehala etortzeko; bazekitek zer egin.
Luis.- Gaur nagusiari amorraraziko zioagu. (Irten bedi)
Lino.- (eseriaz) Ederki, ederki... ! Hau ondo irteten bazaigu...
|
