|
Gregorio Mujika. Utzi beharko!
VI
Luis, Lino, Erretratatzaile eta Dardarizo
Erretratista.- (Sartuaz) Hori ijito bihurria... Bekainean jo eta botatzeko gogoa ematen zidan...
Dardarizo.- (Atetik eta dardaraka) Sar al liteke?
Erretratista.- Aurrera. Zer nahi duzu?
Dardarizo.- Berehalaxe erretratatzea nahi nuke.
Erretratista.- (Dardaraz ikustez harrituta) Erretratatu nahi duzula?
Dardarizo.- Bai jauna. Baina ez izutu dardaretako handia dudalako. Bi segundotan egon naiteke geldi, nahi izanez gero.
Erretratista.- (Behar duk hementxe pazientzia...) Jar zaitez hemen. (Hau arratsalde gorria gaurkoa!)
Dardarizo.- (Dardaraka eseri bedi) Ezkailu bat bezain osasuntsua naiz ni. Dardarako pittin hauxe besterik ez daukat. (Dardarizo handia agertuaz)
Erretratista.- Hori agirian dago, gizona. (Jar beza Dardarizo makinari begira; burua alde batera erortzen zaiola ikustean, zuzen jar biezaio; bi edo hiru aldiz hori bera egin bezate) Alperrik duk...
Dardarizo.- Ez... ez... Esan iezadazu noiz egon behar dudan geldik, eta egongo naiz.
Erretratista.- Oraintxe ba gizona, oraintxe... Gora burua; begira honantz... Dardarizok bat-batean altxa beza burua indarrez, eta aho-zabalik geldi bedi) Irten du.
Dardarizo.- Ederki irtengo zen. Ea erakutsi iezadazu...
Erretratista.- Berehalaxe... (Kristala hartuta joan bedi)
Dardarizo.- (Luis eta Linori) Zer deritzozue? Ondo egin al dut nire papera?
Luis.- Bikain, motel.
Lino.- Hitz egin ezak isilago, aditu egingo dik-eta.
Luis.- Hemen duk!
Dardarizo.- (Dardaraka) Bai... bai... nahi dudanean geldi egoten naiz.
Erretratista.- Hara hemen.
Dardarizo.- Ea... ea ikusi. Baina zergatik atera nauzu ahoa irekita?
Erretratista.- Irekita zeneukalako.
Dardarizo.- Ez jauna, nik itxita neukan.
Erretratista.- Ez ditugu oraindik denak entzun... Tonela baino gehiago irekita zeneukan, gizona.
Dardarizo.- Itxita neukan. Nik ez dut erretratu hori nahi. (Lurrera jaurtiaz)
Erretratista.- Zoratuta al zaude, gizona?
Dardarizo.- Zu zaude zoratuta, zu. Atrebitu horrelako erretratuak ateratzen... !
Erretratista.- Hara... zoaz lehenbailehen nire etxetik...
Dardarizo.- Bai, gizona, bai... banoa. Baina bihar ipiniko dut periodiko guzietan, zu zer zaren... A zer erretratista hauxe... !
Erretratista.- Zoaz hemendik agudo...
Dardarizo.- Ahoa itxita jarri eta ahoa zabalik atera... A zer erretratista, hauxe... ! (Bihoa)
|
