|
Gregorio Mujika. Utzi beharko!
VII
Luis, Lino, Erretratista, Mozkorra, Konkorra eta Itsua
Erretratista.- Zer deabru zen hori! Gaur egun ona diagu behintzat, arraiok ez badu... Bat edo bati burua hautsi ez diodanean eh...
Lino.- Ez bedi estutu, nagusi... Gauza hauek horrela izaten dira. Ez bedi estutu.
Erretratista.- Horrela izaten direla? Gainez egiteko gutxi behar diat ba oraintxe... Denak hankaz gora botata joango nauk, eta hor geldituko zarete etorriko diren alproja guziak erretratatzen.
Mozkorra.- (Konkorra eta Itsuarekin sartu eta gero) Nagusi...
Erretratista.- (Zein dugu hau berriz? Mozkortuta dago hau... )
Mozkorra.- Sartu al liteke?
Erretratista.- Zu sartu zara behintzat-eta...
Mozkorra.- Tira ba...
Erretratista.- Zer nahi duzu?
Mozkorra.- Hara ba. Hauek biok, nire ilobak dira, eta erretratatu egin nahi ditut.
Erretratista.- Jarri ba.
Mozkorra.- Et... et...! Poliki, poliki... Hau konkor gabe atera behar duzu; hau, bi begiak irekita dituela... Eta ni, mozkorrik gabe.
Erretratista.- Baina gizona...! Lino, ekar ezazu zerra bat honi konkorra ebakitzeko; zuk, Luis, Santa Luziari eska iezaiozu honi begiak argitzeko, eta zu...
Mozkorra.- Berriketa gutxi hemen... Zuk egin Ezazu esandakoa, bestela ostikada galanta hartuko duzu... nonbaiten.
Erretratista.- Zer? Niri burla egitera etorri al zarete honantz? Ikusiko dugu ba. Kanpora hemendik! (Bultzaka bidal bitza)
|
