|
Martzelino Soroa. Alkate Berria
XII
HAMABIGARREN IRUDIA
Lorentxo eta afeitatzailea.
Lorentxo.- Egun on.
Afeitatzailea.- Egun on digula.
Lorentxo.- Ez da alde honetan bizi afeitatzailea?
Afeitatzailea.- Ni naiz, zerbitzeko.
Lorentxo.- Horra, bada: ni nator afeitatzera edo bizarra ebakitzera, beste izkina horretan gelditu den lagun batekin eta nahi nuke jakin zenbat eramango gaituen biei.
Afeitatzailea.- Sei koarto bakoitzarengatik.
Lorentxo.- Ondo da. Baina jakin behar du nire laguna dela oso bizar lirainekoa.
Afeitatzailea.- Ez dit axolarik. Esku xamurra dut nik.
Lorentxo.- Laguna ekartzera noa, bada.
Afeitatzailea.- Bazkaritako koartillo ardoa irabazi dut.
Lorentxo.- (Astotxoarekin) Arre, arre; hona non duen nire laguna, eta kontuz labana ibili zergatik azal fina duen.
Afeitatzailea.- Zer! Nik astoa afeitatu?
Lorentxo.- Jarri, jarri zapia lehenbailehen.
Afeitatzailea.- Baina zu mozkorra zaude edo zer?
Lorentxo.- Berriketa gutxi eta tratua, tratua da.
Afeitatzailea.- Mila deabru!
Lorentxo.- Baita lau mila ere, nahi badu.
Afeitatzailea.- Ez dut afeitatuko.
Lorentxo.- Ez, e? Jakin beza, bada, oilarraren jabea naizela, eta ez badu afeitatzen, alkateari deituko diodala.
Afeitatzailea.- Ez zen hori tratua.
Lorentxo.- Oilarrarena ere ez zen hala tratua, baina nahaspila bat sortu dit eta beste nahaspila batekin pagatzen diot. Astotxoa berorren zain dago.
Afeitatzailea.- Topa iezaiozu, bada, behorra.
Lorentxo.- Eta jar biezaio zapia edo aski ez bada maindirea.
Afeitatzailea.- Lehenago afeitatuko nuke balea.
Lorentxo.- Balira guztiak berori bezalakoak, agudo mundua lurperatuko litzateke. Ea, agudo, bilguman hitz egin behar du eta…
Afeitatzailea.- Alferrik zabiltza.
Lorentxo.- Bai? (Alkatea agertzen da alde batetik) Alkate jauna hemen dator eta nik eskatuko diot justizia.
Afeitatzailea.- Baina gizona…
|
