|
Martzelino Soroa. Baina zein naiz ni?
Hamargarren Irudia
X
Lehengoak eta Joxe Anton
Jose Anton.- Truko... Truko...
Atanasio.- Maiorazko jauna!...
Batixta.- Jauna...
Jose Anton.- Eee?
Patxi.- Beraz, hemen dabil!
Jose Anton.- Uste dut baietz.
Hirurak.- Ja, ja, ja!
Atanasio.- Hasi da, hasi da.
Jose Anton.- Hazi? Aspalditxo honetan ez askorik.
Atanasio.- Je, je!
Jose Anton.- Eta, ja, ja! Umore ona daukazue, noski.
Atanasio.- Berorrek bai, berorrek, maiorazko jauna.
Jose Anton.- Maiorazko jauna? Ja, ja, ja! Zuek hamaiketakoa goiz xamar egin duzue gaur, noski.
Atanasio.- Baina, maiorazko jauna...
Jose Anton.- Zer maiorazko eta miloi asko!
Atanasio.- Badakigu bai oso alaia dela.
Jose Anton.- Bai, e? Ez dut bada nik oraindik hamaiketakorik hartu.
Atanasio.- Baina, maiorazko jauna...
Jose Anton.- Berriz?
Atanasio.- Jakinaren gainean zaude, bai, xelebrekeriaz uka lezakeela ere.
Jose Anton.- Ukatuko ez dut, bada?
Atanasio.- Horrenbesteraino?
Jose Anton.- Zer bada? Baina, zein naiz ni?
Atanasio.- Je, je! On Baldomeroren iloba.
Jose Anton.- Zer Baldomero eta salda bero? Ja, ja, ja!
Atanasio.- Je, je! Berorren osaba.
Jose Anton.- Nire osaba? Ja, ja!
Atanasio.- Bai, maiorazko jauna.
Jose Anton.- Bada ez, gezurzulo jauna.
Atanasio.- Nola ez?
Jose Anton.- Nola? Hala. Baina, zein naiz ni? Maiorazko baten aurpegia al dut nik?
Atanasio.- Ezin eta gehiago.
Batixta.- Baita birena ere, jauna.
Patxi.- Baita hirurena ere.
Jose Anton.- Bai; bat nirea eta besteak besteenak.
BATISTA Osaba jaunak nahi du, bada, beregana berehala azaltzea.
Jose Anton.- Eskumuinak, bada, utz iezadazue bakean nire etxera joaten.
Atanasio.- Nora?
Jose Anton.- Horra.
Atanasio.- Berorren etxea, etxola hori?
Jose Anton.- Bai, nirea; edo ni bizi naizena.
Atanasio.- Berorrek palazioa du!
Jose Anton.- Pala... palazioak ez, pala-aitzurrak ditut nik.
Atanasio.- Berandutu egingo zaigu, jauna.
Jose Anton.- Baina seta horrekin...
Patxi.- Osaba zain egonda...
Jose Anton.- Zer osaba eta izeba?
Batixta.- Bai, bai, jauna; lehenbailehen joatea onena izango du (Hizketan presaka.)
Jose Anton.- Baina...
Atanasio.- Utz beza orain barre kontuari!
Jose Anton.- Utzi? Hau bai dela barre kontua.
Atanasio, Patxi eta Batixta .- Goazen, jauna, goazen.
Jose Anton.- Baina... baina...
Atanasio.- Goazen, goazen.
Batixta eta Patxi .- Bai jauna, bai (Zalapartan eta batean hizketan eramaten dute jira eta bira eraginez.)
Lehenbiziko egintza - azkena
|
