|
Martzelino Soroa. Baina zein naiz ni?
Hamabosgarren Irudia
XV
Joxe Anton eta Leandro
Leandro.- Maiorazko jauna...
Jose Anton.- Oraindik horrela gara?
Leandro.- Zer ikusten dut? Soina mudatuta? Zer itxura da hori? Hori ere gogoratu zaio? Baina zer zelebrea den berori? Je-je! Txoratuko du osaba berorren aterakeriekin.
Jose Anton.- Baina, zein naiz ni?
Leandro.- Oraindik horretan da?
Jose Anton.- Eta zu oraindik horretan zara? Begira nik orain nahi dudana da...
Leandro.- Kafea?
Jose Anton.- Atea.
Leandro.- Ahatea ere ekarriko diogu, bada, nahi badu. Hemen erreka aldean baditugu mordoxka bat...
Jose Anton.- Zu bai zarela xelebrea, zu. Kanpoko atea nahi dut nik.
Leandro.- Bai, jauna, bai; kanpoan ibiltzen dira.
Jose Anton.- Atariko atea.
Leandro.- Gehienean hor al dira! Baina, zer itxura hartu duen maiorazko jauna!
Jose Anton.- Ez naizela ni maiorazko eta...
Leandro.- Nahi duen bezala, nahi duen bezala.
Jose Anton.- Naizen bezala, naizen bezala, eta ez ez naizen bezala.
|
