|
Martzelino Soroa. Urrutiko Intxaurrak
Bigarren Irudia
II
Egile bera eta Aiton Josepe
Aiton Josepe.- Jaungoikoak egun on digula.
Pillipe.- Hala digula, aitonatxoa. Bizkor dabil.
Aiton Josepe.- Bai, bai. Urteak gainean.
Pillipe.- Zenbat ditu, bada?
Aiton Josepe.- Nik al dakit? Nire senide guztiak hil ziren, eta gazteenak berekin zituen laurogei urte, hala nik izango ditut…
Pillipe.- Laurogeita hamar?
Aiton Josepe.- Hor nonbait. Frantsesak sartu zirenean.
Pillipe.- Berori ez zen artean zahartu…
Aiton Josepe.- Zahartu ez, baina bizarra kentzen nuen.
Pillipe.- Eser bedi, eser bedi. Berorrek gauza asko ikusi ditu mundu honetan.
Aiton Josepe.- Bai, txar eta on, makina bat.
Pillipe.- Txarrak gehiago?
Aiton Josepe.- Bai, arranopola! Ni, bada, nentorren…
Pillipe.- Tira, zertara zetorren?
Aiton Josepe.- Zeraren zerera…
Pillipe.- Zertara?
Aiton Josepe.- Horretara, bada, horretara.
Pillipe.- Ahaztu egin zaio berorri.
Aiton Josepe.- Egia esan behar badut, bai.
Pillipe.- Beti bezala. Gauza batez ez da ahazten, zertara datorren ahaztea.
Aiton Josepe.- Nentorrela eskailera gora, mingainaren puntan nekarren bada…
Pillipe.- Eskailera?
Aiton Josepe.- Ez, Prenando.
Pillipe.- Ba al daki aurki datorrela?
Aiton Josepe.- Bai, bai, hori. Horretara nentorren.
Pillipe.- Berorren besoetakoa da?
Aiton Josepe.- Bai, gizagaixoa.
Pillipe.- Maite zuen?
Aiton Josepe.- Gogotik. Ondo etorri al da, lodia?
Pillipe.- Ez da oraindik inguratu, baina agudo…
Aiton Josepe.- A! Oraindik ez? Sarri arte, bada.
Pillipe.- Nora doa? Amandreari egun onak ematera?
Aiton Josepe.- Ez, gero etorriko naiz. Kalera nindoan.
Pillipe.- Hor amandrearen gela du…
Aiton Josepe.- A! Bai, bai. Sarri arte.
Pillipe.- Bihoa ondo. Kontu eskaileretan.
|
