 |
|
|
|
9
Ezagutu ezazu
| Basoko Arku Tiraketa |
Arkulari gazte bat basoko ibilbidean topatu duen animaliaren irudiari jaurtitzeko unean. |
| Geziak prest |
Udaberria sasoi
aproposa da garai bateko ehiztarien modura
ibiltzeko: arkulariak basoko animaliei erne daude dagoeneko, animaliak
gomazkoak badira ere.
|
Udaberria iritsi da,
eta jaurtiketa aretoetatik irten eta
basoan barrena sartzeko irrikan daude gaur egungo Robin Hood-ak. Basoko
arku tiraketa duela urte gutxi hasi zen praktikatzen nazioartean eta
gero eta zale gehiago ditu. Euskadin, berriz, kirol honek oso harrera
ona izan du hasieratik, ehizaren alternatiba ekologikoa baita.
Arkulariek bidean aurkitzen dituzten irudiei jaurti behar diete.
Taldeka joaten dira, gehienetan launaka. Bidean, tamaina ezberdineko 20
irudi kokatzen dira, poliuretano-aparrezkoak. Distantzia ezberdinetara
jarrita daude, eta hor dago koxka: gezia nora joango den jakiteko
distantzia ezagutzea ezinbestekoa baita. Hori dela eta,
«senezko
jaurtiketa» deitzen zaio arku tiraketa mota honi.
Gorputz-jarrera eta arnasa kontrolpean izan behar ditu arkulariak,
desbideratze txikienak geziaren norabidea aldatzen baitu. Arkulari
bakoitzak bi gezi jaurti behar dizkio irudi bakoitzari: honela, lehen
jaurtiketak bigarrena nola egin behar duen jakiteko arrastoa ematen dio
arkulariari. Jaurtiketak egin ondoren, geziak jaso eta lortutako
puntuazioa zenbatzen du arkulari bakoitzak.
Arku tiraketaren jarraitzaileek jakingo dute, seguruenik, abian dela
basoko Euskal Liga. Apirilaren 13an laugarren jardunaldia jokatuko da
Gipuzkoako Arku Tiraketa Federazioaren eskutik. Non? Ordiziako klubak
Gaintzan duen ibilbidean.
Euskadin, basoko arku tiraketa praktikatzeko toki egoki gutxi
daude: oso gutxi dira etxearen inguruan arkulariak ibiltzea
begi
onez ikusten dutenak.
Kontuz
geziekin
- Arkulari batek gezia jaurtitzen duen bitartean, ikusleak
atzean
egon behar dira geldi-geldirik.
- Azkeneko gezia jaurtitzean, arkularia erretiratu eta besteek
lurrean dauden geziak jaso ditzakete.
- Txapelketetan, arkularien eremua bereizten duen lerroa
markatuta
dago eta ezin da hura gainditu.
- Geziak arkuaren potentziaren araberakoak izan behar dira.
Hobe
da behar baino pisutsuagoak eta luzeagoak izatea, arinegiak eta
motzegiak baino. Izan ere, laburregiak izanez gero arkulariari min egin
diezaiokete eskuan.
- Ez bota gezia gorantz, non eroriko den jakitea zaila baita.
|
|
| |
 |
 |
|
|
|
 |
