– Bi domina lortu dituzu Europako txapelketan. Beste bi, lehenik zenituenez gain. Podiumera igotzeak ohitura sortzen al du?

– Ez du inolako ohiturarik sortzen, lehiaketa bakoitzak zailtasun jakin batzuk dituelako, beste urte batzuetakoen bestelakoak direlako, eta podiumera igotzea asko kostatzen delako.

– Denborak aurrera egiten duen heinean, lehiaketen lilurak behera egiten al du?

– Inolaz ere, nik nola bizi ditudan kontuan hartuz behintzat. Europako eta munduko txapelketa bakoitza sari ezin hobea da, lurralde bakoitzeko lehiakide bakar bati ematen zaiona.

– Nola egiten duzu karateko elitearen parte izan eta aldi berean enpresa batean lan egiteko?

– Argi dago eliteko kirolaria izatea gogorra dela, eta are gehiago emaitza onak lortzea, nire kasuan hiru bider Europako txapeldun eta bi bider munduko txapeldun izatea. Eta are gogorragoa da oraindik, hori lortzeko esfortzua egitearekin batera enpresa batean 8 orduz lan egiten baduzu. Enpresak ematen dizkidan oporrak txapelketetara joateko erabiltzen ditut. Beraz, noizbehinka gorriak eta bi ikusi behar izaten ditut.

– Atzera begiratzen duzunean, une onak ala txarrak dira nagusi?

– Kirolean alaitasun eta atsekabe handiak izan ohi dira. Azken hauei berehala aurre egiten ikasi behar da, eta alaitasunak, berriz, gozatzen, azken malko horiek desagerrarazi arte. Kirolari esker, gainera, gauzen balioa aintzat hartzen ikasi dut. Ez dut inoiz ere pentsatu pozak negarra eragin dezakeenik, eta txapelketa honetan, irabazi ondoren, negar batean aritu nintzen.  

– Zer egiten du Sestaoko karateka batek Donostiako talde batean?

– Nire bigarren denboraldia izan da hau, eta bi urte hauetan lortu ditut, hain justu, nire emaitzarik onenak. Ez dut kointzidentzia denik uste. Klubak erraztasun ugari eman dit tramiteak egiteko, lehiaketetan parte hartzeko eta karateka talde paregabe batekin lan egiteko. 

– Zein aholku emango zenieke Alvaro Rivas eta Gorka Pazi?

– Lehenik eta behin, zoriondu egin nahi ditut lortu dutenagatik. Bigarren, lorpen handiagoak eskuratzera eramango dituen bidearen hasieran daudela, baina bide hori oztopoz beteta dagoela eta pixkanaka jo behar dutela esango nieke.

– Non ikusiko zaitugu aurki?

– Ekainean klubetako Espainiako txapelketan hartuko dut parte, Euskadiko txapelketan plaza lortu baikenuen. Uztailean, berriz, Venezuelara joateko asmoa dut, Iberoamerikako Txapelketara. Uda pasa eta gero Japoniako mundialean izango naiz, eta han amaituko dut urtea.

– Zein da Patxi Martinezen ametsa? Karatean dena lortu al duzu?

– Nire ametsa kirolaria besterik ez izatea da, beste espezialitate batzuetako kirolari onek egiten duten bezala, baina karatean, kirol minoritarioa ez baina minorizatua den heinean, hori lortzea oso zaila da.