Nork ez du noizbait betiko frisbeearekin jolastu? 50eko
hamarkadan
Amerikako Estatu Batuetan asmaturiko objektu hegalari honek izugarrizko
arrakasta lortu zuen berehala, eta hainbat kirol eta jolas sortarazi
zituen, horien artean ultimate, disc golf eta freestyledisc. Azken
urteotan, tradizio handiko kirolak bihurtu dira AEBetan eta Kanadan,
baina beren oihartzuna Euskadira ere iritsi da; zehazki,
Ibarrara.
Jan Soerensen danimarkarrak betidanik egin du
freestyledisc. 2005 urtean Europako txapeldun bihurtu zen. Gaur egun
Ibarran bizi da, eta herriko gazte talde batekin entrenatzen du. Baina
bere asmoa kirol modalitate bitxi hau ezagutzera ematea da.
Zertan datza freestyledisc? Bada, «diskoarekin mugimenduak
egin eta jokalarien artean pausoak sortzean», azaldu digu
Janek. Bakarrik edo taldeka jolas daiteke, aire zabalean edo toki
itxietan. Jolasteko aukera zabala da, eta behar den gauza bakarra
frisbeea da.
Janek Donostian txapelketa bat antolatzea du helburu.
«Izugarrizko hondartza onak daude freestyledisc egiteko.
Hemengo jendea animatzea lortzen badut, Europako freestyler batzuk
gonbidatuko ditut», esan digu.
Duela urte batzuk, free-styledisc kirolaren modalitate
berria asmatu zuen Janek: disctwirls. Oinarrizko mugimendu ezberdina
du: kirol tradizionalean diskoari indarra emateko bi eskuak erabiltzen
diren bitartean, modalitate berrian hatzarekin diskoa biratuz hasten da
oinarrizko mugimendua.
Gainera, diskoa horizontalki mugitu beharrean,
bertikalki biratzen da, eta askoz ere ikusgarriagoa da.
«Mugimenduak egin eta koreogafia gehiago asmatzeko aukera
ematen du, diskoaren kontrola handiagoa baita», adierazi du
Janek.
Kirol gisa, freestyldisc ezin hobea dela diote
praktikatzen dutenek. «Sasoi onean egoteko era paregabea
da». Baina ariketa fisikoaz gain, irudimena lantzen ere
laguntzen du, «edozeinek asma ditzake mugimendu eta trukuak,
eta beraz, oso dibertigarria da».
|
