Bizi garen
garaiotan, gizartean gero
eta arrakasta handiagoa du plazer hutsez ibiltzeak. Aisialdia betetzeko
modu bat hainbat parajetatik barrena oinez ibiltzea dugu, eta paraje
horiek herri, eskualde, erkidego edo nazio mailakoak izan daitezke.
Ibiltzea, gainera, osasungarria da, kirol ariketa bat egiteko eta
aisialdiaz gozatzeko modua. Zalantzarik gabe, natur inguruneek hiri
barrukoek baino erakargarritasun handiagoa dute, baina hirikoek ere
badute beren xarma.
Donostia Kirolak eta Vasco de Camping Elkarteak berreskuratu eta
aurkeztu berri duten Donostiako Itzulian, antzina mendi-bidea zena
zementuz estalita dago egun, eta baserri inguruko ibilbide bukoliko
hark xarma pixka bat galdu duen arren, bizi-bizirik dirau. Izan ere,
nahiz eta landa-ingurunea eremu hiritarrera lerratu den, oraindik ere
gogor egiten baitio desagertzeari.
Bistarik ederrenak
Itzuli
honetan paisaia zoragarriak ikus ditzakegu, alde guztietatik eraikin
ugari hazi diren arren, eta bertakoak nahiz kanpokoak liluratuta eta
harrituta uzten zituen eraztun berdearen nagusitasuna gutxitu egin den
arren. Hala eta guztiz ere, talaia desberdinetatik topa ditzakegun
ikuspegiak ahaztezinak egingo zaizkigu, eragozpen guztiak gorabehera.
Ibilbidea Kresala SM taldeak prestatu zuen 80ko hamarkadan (1982), eta
bideak berak duen herri-izaeragatik, oso harrera ona izan zuen zaletuen
artean. Urtero irteera bat antolatzen zen ibilbide hau osatzeko, bai
oinez eta bai mendiko bizikletaz ere.
Donostiako Itzulia lurreko bide eta pistetatik barrena zihoan neurri
handi batean, eta nahiz eta kutsu landatar hori oraindik ere gordetzen
duen, xarma pixka bat galdu du, gaur egun zementu eta asfalto gainean
egiten baita dena.
Oinez zein bizikletaz Mendi-ibilbide osoa egitea ezin hobea da.
Bereziki, oso gomendagarria da mendiko bizikletaz egiteko, eta baita
azkeneko metroak korrika egiteko ere. Ez dago galtzeko arriskurik,
balizak baitaude bide guztian, eta marka zuri-urdinak oinez
dabiltzanentzat. Laranja koloreko antzinako markak geratzen dira
ibilbidea bizikletaz egiten dutenentzat.
Oinezkoentzako bideak 35 km neurtzen du, eta 42 km mendiko bizikletaz
egiten denak, ibilbidean zehar errepideren bat hartu beharra dugulako
tarteka, mendi-bide bakan batzuetatik joan beharrean. Ibilbidearen
sektore bat Astigarragako lurretatik igarotzen da. Gogoratu beharra
dago ibilbide hau egin zenean Astigarraga Donostiaren parte zela.
Bide biribila denez gero, irteera eta helmuga Donostiako Udaletxea
izango da, baina horren purista ez direnak Ondarretako Ezeiza Hoteletik
has daitezke, nahiz eta era horretan itsasertzeko pasealeku paregabea
galdu egingo duten.
Garrantzitsua da ibilbide hau zatika edo sektoreka egin daitekeela
adieraztea, bidean aurrera goazela hiriburura itzultzeko aukera izango
baitugu garraiobide publikoa erabiliz.
 
 
Donostiako
Itzuliaren
oinezkoentzako bideak 35 km neurtzen du, eta bizikletaz
egiten denak, berriz, 42 km.
Mendiko
bizikletentzako ordezko bideak
Ibilbide hau berezia da mendiko bizikletarekin egiteko. Guztira 42 km
dira eta eroso samarra da.
“Erregenea” egoitza multzora iristean,
txirrindulariek
ingurabidetik barrena jarraitu beharko dute, parkearen goiko aldean
sartuz.
Añorga Txikira jaisterakoan, Lindaberri baserriaren bideari
jarraitu beharrean, errepidean aurrera egin liteke, eta gero, auzoaren
aldirietan bidearekin bat egin.
Ergobian, mendiko bizikletentzako ibilbideak, industrialdean sartu eta
gero, ezkerretara topatuko dugun bigarren bidegurutzetik joko du,
“Oiarbide bidetik” hain zuzen ere.
Santiagomenditik jaistean, berriz, mendiko bizikletazale batzuek
errepidetik jarraitu ohi dute, baina mendi-bidea ere guztiz egokia da
bizikletaz ibiltzeko.
Uraren garraio-dorreen mendiko bidean, Astigarragako Bentak-Perurena
igaro ondoren, ur-biltegira iristen garenean, ezkerretik doan pista
hartu behar da, eta Putzuetako urtegira Menditxo jatetxetik barrena
iritsi, eta gero, Garbera-Eroski errepidearekin bat egin. Mendiko bidea
eginezina da bizikletentzat.
Mirakruz gainetik Uliara doan igoeran, Mendiola bidetik barrena PR
mendiko bidera iristen garenean, gomendagarria da errepide estuan
aurrera segitzea Mendiolako zabaldiraino, eta gero ezkerretara jo,
pisten bidegurutzean mendiko bidearekin bat egin arte.
Erreginaren eta Baleazaleen haitzak eta errota gainditu ondoren, Uliako
mendi-bizkarrean, egokiagoa da errepidetik jaistea plazatxoraino, eta
eskuinetara hartu iturriko bidetik funikularraren lubaki-bide
zaharreraino, Ategorrietaraino, eta bide zaharretik
Zurriolaraino
jarraitu, nahi izanez gero “Zemoria” kaleko
gainbehera
handia ekiditeko, baina ohartarazi behar da bide tarte hori ere egokia
dela bizikletentzat.
1
Donostia: Ibilbidea Udaletxean hasten da eta Kontxako
pasealekutik barrena doa Ondarretako hondartzaraino.
2 Igeldo:
Ibilbideak
Igeldoraino eramango gaitu. Ordezko bidea ere egin daiteke, Etume
egoitza-multzotik barrena.
3 Añorga
Txiki: Garoa
kanpinaren plazatxotik hasita, A-8 autobide azpiko igarobidetik Aingeru
Zaindariaren bidegurutzera eta handik Añorga Txikira
iritsiko
gara.
4 Oriamendi:
Añorga Txikin Oriamendira doan pista hartu ondoren,
Astigarragako lurretan sartu eta Ergobiara helduko gara.
5 Santiagomendi:
Ergobiatik Santiagomendi gailurrera iritsiko gara, eta handik,
Astigarraga, Oiartzun eta Errenteriara doazen errepideen bidegurutzea
den Astigarragako Bentak-Perurenara.
6 Intxaurrondo:
Errenteriara doan bidea jarraituz, Arkiri Baserrira helduko gara,
Itxaurrondo-San Marko pistara. Garberako Bidegorria hartuz,
Intxaurrondora iritsiko gara. Handik, Zubiaurre zubia zeharkatu eta
Mirakruz gainera.
7 Ulia:
Mirakruz gainean,
Ulia mendiaren oinetik gora eginez, mendi tontorrera iritsiko gara.
Donostiako ikuspegirik ederrenekin gozatu eta gero, behera egingo dugu
Okendo kultur etxeraino, eta handik Donostiako Udaletxeraino.
|
