Ekainaren 14ean Donostia areto-futbolaren hiriburu bilakatuko da.
Txapelketa Donostialdeako zortzi kiroldegitan jokatuko da aldi berean,
goizez eta arratsaldez. Lehen mailako areto-futbola eskainiko duen
ikuskizun paregabea.
Intxaurrondoko CDI kirol elkarteak antolatzen du urtero
txapelketa. Antolatzaileek azaldu digutenez, «Donosti Cup
futbol
lehiaketaren arrakasta ikusita, areto-futbolari beharrezkoa duen
bultzada emango zion antzeko torneoa antolatzea bururatu
zitzaigun».
Aurtengoa hirugarren edizioa da eta, dirudienez,
txapelketak
sendotzeko bidea hartu du dagoeneko. Izan ere, parte-hartzea inoiz
baino altuagoa izango da. «Izena emateko epea bukatzeko
hilabete
falta zenean, iazko talde kopurua gainditu genuen. Oso datu positiboa
da», azaldu digu Javier Donamaria kirol elkarteko
gerenteak.
Gainera, aurreko urteetan ez bezala, emakumezkoen
taldeak ere
izango dira. «Oso pozik gaude aurtengoan emakumezkoen 12
taldek
parte hartuko dutelako. Iaz, berriz, ez zen emakumezkorik izan, bost
taldek bakarrik eman baitzuten izena».
48 talde
Lehiaketak 48
talde bilduko ditu: 36 gizonezkoenak eta 12 emakumezkoenak. Leku
askotatik etorriko dira, besteak beste, Katalunia, Toledo, Extremadura,
Kantabria, Galizia, Aragoi, Mallorca, Nafarroa, eta Euskaditik.
Gainera, aurten nazioarteko torneoa dela esan daiteke, Frantziako
Orleans taldeak ere parte hartuko baitu.
Estreinako ekitaldian 18 taldek parte hartu
zuten, eta
Iruñeko Sotak irabazi zuen. Lehen mailako taldeak parte
hartzeak
txapelketaren antolaketari berriz heltzeko kemena eman zien
antolatzaileei: «Lehen mailakoa izanik, txapelketa maila
handikoa dela geratu zen agerian». Bigarren urtean, berriz,
Bilboko GSI taldeak eskuratu zuen txapela Sotaren aurka jokatutako
finalean.
Gauzak horrela, lehiaketak areto-futboleko talderik
onenak
ikusteko aukera emango du. «Parte-hartzaileen maila gero eta
handiagoa da. Kalitatezko areto-futbola eskaini nahi dugu, eta aldi
berean, aste bukaera polita igarotzeko aukera eman nahi diegu kanpotik
etorriko diren taldeei».
Gainera, irabazleen artean 6.000 euro baino gehiago banatuko dira:
3.000 euro txapelketa irabazten duenarentzat eta, gainontzekoa, lehen
postuetan gelditzen direnentzat.
Maila
hobetu beharra
Areto-futbolak toki garrantzitsua du kirol elkartean: lau talde dituzte
kategoria ezberdinetan, eta horietako bat zilarrezko mailara igotzear
dago, maila horretako Gipuzkoako talde bakarra izanik.
Kirol honek Gipuzkoan bizi duen egoerari dagokionez,
gipuzkoarrak maila gorenetan sartzea beharrezkoa dela uste
dute
antolatzaileek. «Gipuzkoan ez dago ohorezko edo zilarrezko
mailatan jokatzen duen talderik. Gure inguruan, berriz, Bizkaian,
Araban edo Nafarroan, hainbat talde dituzte maila gorenetan. Guk
zilarrezko mailara igotzeko aukera dugu, eta hala bada, ea ondo
aprobetxatzen dugun».
Aldi berean, taldeen maila hobetzeaz gain, jokalari
gipuzkoarren maila ere hobetu beharra dagoela uste du Javier
Donamariak. Eta horretarako, erreferentziazko taldea sortu beharra
dagoela irizten du: «Futbolean Reala eta saskibaloian Bruesa
ditugun bezalaxe, gurean ere erreferentziazko taldea osatzeko
esfortzua egin beharko litzateke. Ibarra oso talde ona izan zen, baina
maila galdu zuenetik taldea ahuldu egin zen. Tamalgarria da horrelako
talde garrantzitsuak desagertzea».
|
