Real eta Atletico
Donostiako Real Sociedad eta Atletico San Sebastian klubek ondo baino hobeto amaitu dute atletismoko Ohorezko Mailan egin duten denboraldia. Hirugarren eta laugarren postuak lortu dituzte, hurrenez hurren, eta datorren urtean kategoria berean egoteko aukera izango dute, beraz.

Martxan 
Maiatzaren 8tik 11ra Kirolaren eta Osasunaren I. Azoka egin zen Kursaalen. Martxan izenpean, gipuzkoarrak kirola egitera animatzeko helburua izan du. Gerturatu zirenak 45 erakusmahai ikusi eta gai nagusiari buruzko hitzaldiak entzun ahal izan zituzten. Kirolaren munduko hainbat pertsonaia izan ziren bertan, Real eta Bruesa GBC taldeetako jokalariak, besteak beste.

Juanito Oiarzabal 
Munduko errekorra duen arabar mendizalea erretiratu egingo da udazkenean. 22 zortzimilako lortu ondoren, 23.a igotzeko asmotan dago orain: Cho Oyu. Irailean helduko dio helburu honi, baina ordura arte, Juanito Oiarzabalek 45 egun eman beharko ditu gutxienez menditik urrun, Makalu mendia jaisten ari zela jasan zituen izozte arinen ondorioz.  

Levante 
Jokalariek mugarik gabeko greba hasi zuten maiatzaren erdialdean, klubak azken bi urteotako soldata zor dielako. Real Madriden aurkako partida aprobetxatu zuten grebari ekiteko, eragin handiagoa izango zutelakoan. Dirudienez, jokalariek hitzartutako soldataren %20 besterik ez dute jaso.