Eskaintza zabala
Eskola kiroleko lehiaketa guztietan parte hartzen dute ikastetxe honetako ikasleek (futbolean, saskibaloian, hockey-an...), baina hortik kanpo ere beste hainbat kirol praktika dezakete ikasleek, hala nola, xakea, gimnasia erritmikoa, gym dance izenekoa, eskrima, judoa eta tenisa, esate baterako.
Donostiako ikastetxe gehienetan kirol ezagunenek, alegia saskibaloiak eta futbolak dute arrakasta handiena ikasleen artean. «San Alberto Magnon, ordea, gutxiengoen kirolak nabarmentzen dira, batez ere. Hain ezagunak ez diren kiroletan parte hartzaile gehiago dago eta judoak bereziki indar handia du gure ikasleen artean».
Hori bai, Urrestarazuk aitortu duenez, orokorrean bertako ikasleen artean mutilak neskak baino gehiago dira kirola egiten dutenak, «eta Bigarren Hezkuntzan jada ikasleek oro har kirol gutxiago egiten dute, batez ere kirola egiten duenak ikastetxetik kanpoko taldeetan egiten duelako», dio koordinatzaileak.
San Alberto Magno ikastetxeak hainbat kirol talderekin elkarlanean jarduten du: CD Deutsche Scule, Atlético SS, Fortuna eta CD Gimnasia Donostirekin eta ikastetxe honetatik ere goi mailako kirolariak atera izan dira. Horien artean, Oiana Blanco judoko Munduko txapeldunordea. Oiana, Esteban Arrillaga bere entrenatzailea eta Maria Jesus dira ikastetxe horretan judoak halako arrakasta izatearen erantzule nagusiak. 90 ikaslek egiten dute judoa, guztira.
