|
Koloreak, bizitzaren arima
1.- Berdea
Benda belarra eztimamituz
zure seden baitara,
Bake-Berdeak iratzartzen du
Ama Lurraren taupada,
BERDEA zure edertasuna
edertasun betea da,
itxaropen begirada,
txorrotxioen balada, (bis)
pintzel urtsuko urdina eta
horiaren besarkada,
nire paleta alaitzen duen
irrifar urtua zara. (bis)
2.- Arrosa
Zuri-gorrien gorri-zuriak
sortu zintuen argira,
geroztik gure erraietatik
ezin zara erretira,
larrosetako petaloetan
esentziaren distira,
barne-indarren pilpira,
maiteminduen desira, (bis)
bizitzak berak amestutako
koadroaren neurrira,
irudi hilen sentimenduak
ARROSEZ margotzen dira. (bis)
3.- Morea
Gorria eta urdina nahastuz
gara MOREAREN jabe,
lan zaborretan esklabu gisa
askatasun hatsik gabe,
aspaldian da emakumea
gizonezkoen mirabe,
beltzuri eta herabe,
lila usaina edabe, (bis)
kuraia eta burubidea,
egitasmoen zutabe;
emakumeen borroka zara
berdintasunaren alde. (bis)
|
4.- Urdina
GibelURDINEN aieru hauskor
bakearen deiadarra,
pentsamenduen usain isila,
sarkor ta zerutiarra,
atsedenleku gisara hartu
ohi duzu maiz ostadarra,
amets gozoen marmarra,
libre sentitu beharra, (bis)
itsas ferekak zeruan bilduz
mugarik gabeko marra,
haize askeaz laztantzen duzu
hegoa eta iparra. (bis)
5.- Horia
HORIA denez laranja eta
berdearen batasuna,
lilitegian nabarmentzen da
narzisoaren lurruna,
musu suharrez tindatzen duzu
maitaleen eraztuna
urreztatuz ondasuna
eta itzartuz eguna, (bis)
eguzki printzez lau haizetara
zabalduz etorkizuna,
zure kolore argitsuekin
jantzi ohi da txapelduna. (bis)
6.- Zuria
Amesten dugun justizi eta
bakearen arabera,
negua ere urtu liteke
elurrarekin batera,
azuzenaren ederrak ere
ZURITIK badu sobera,
bihotzetik bihotzera,
uzkur bezain alegera, (bis)
bizitza baten bukaera ta
beste baten hasiera,
ustez bakarra izanagatik
denen besarkada zera. (bis)
|
7.- Koloreak
Inauteri ta ostadarraren
ezinbesteko baldintza,
pailazoaren soineko eta
zorion beteko ditxa...
gorpuztutako lorategiak
bere baitan garabiltza,
sentimendua ta hitza,
esku emanda dabiltza, (bis)
goi-argirako zubia eta
Van Gogh-enganako giltza,
KOLORE eta lorerik gabe
zer litzateke bizitza! (bis)
|
Irati Goikoetxea Asurabarrena
|
