Beste musikal bat prestatu du Gaztetxok

Intxaurrondoko Gaztetxo elkarteak lan berria estreinatu du aurtengo maiatzean: Aladdin. Lan berezi samarra izan da; orain arte prestatuko musikalak baino laburragoa eta sinpleagoa, azkar prestatutakoa. Zergatik lan hau? Jose Amaia zuzendariak esan digunez, abenduan amaitu ziren "Notre Dameko konkorduna"ren emankizunak, eta urtarrila eta ekaina bitarteko hilabeteak hutsik gelditzen zitzaizkien. Horrelako musikal bat prestatzeko urtebeteko lana behar izaten da, baina hilabete horietan Intxaurrondoko gazteei ekintza interesgarriak eta hezigarriak eskaintzen jarraitu nahi zuten salestarrek. Orduan, lan sinpleagoa prestatzea bururatu zitzaien. Musika eta dantza baino gehiago Lan honen balio hezitzailea nabarmendu nahi izan digute arduradunek. Ezinbestekoa da denok konpromisoa hartu eta gogor lan egitea. Parte hartu duten gazte guztiek entsegu gogorrak egin behar izan dituzte, hamaika boluntarioren laguntzarekin. Gainera, gidoian asko landu dira baloreak, eta agerian gelditzen dira gaur egun gure munduan dauden egoera bidegabeak. Eszena bakoitza landu da gazteekin gogoeta sakonak bideratuz. Horregatik, arduradunak oso pozik agertu dira lortutako emaitzarekin eta egindako lanarekin. Hurrengoan pentsatzen Ekainean amaituko dira emanaldiak eta Gaztetxoko arduradunak dagoeneko ari dira hurrengo musikalean pentsatzen. "Ederra eta piztia" prestatuko dute, eta Lehen Hezkuntzako haurrek ere parte hartuko dute. Irailean hasiko dira lanean.

Testuen Sailkapenerako Kodeak:
Testu Erraza / Testu Normala / Testu Zailagoa / Testu Zailena