ITSASOA

Doinua: Munduko ilunabarra

-1- Zure nahiaren mendeko, zure esklabo antzeko, zurekin bada hobeto, maitasunez nago lepo; nahiz eta zure uhinek niri eman hainbat muturreko, nahiz eta nire bizitza jarri duzun atzekoz aurreko; hainbat urtetan zu izan zaitut etxea eta etxeko... hau gertatzen zait kaitik urruntzen hasten naizen bakoitzeko: nire etxetik ateratzea nire etxera joateko. (Bis)

-2- Zure urak nire babes, zure urak nire amets, zure urak nire trabes, nire lan eta lanabes; kaian bi seme dauzkat begira etsita eta negarrez baina zugatik eurak ez ditut ia ikusten tamalez; urtean bitan lau hilabetez zugana joaten naizenez nire guraso eginbeharrak ez ditut betetzen errez; beraiek nire semeak dira baina ni euren aita ez. (Bis)

-3- Zure uhinak gerrate, zure uhinak min harpe, zoritxarraren alkate, astintzen naute jo ta ke... beraiek nire aita eraman zuten mundutik aparte; harrez geroztik aitarik eza niretzat izan da kate zer dela eta bihurtu zinen heriotzaren uharte? ilargi krudel zara askotan, zorigaiztorako ate: marea behera bultzatzen duzu lur azpira heldu arte. (Bis)

-4- Zure haizeen fereka, zure haizeen olgeta, zure haizeen oreka, zorionaren erreka; baina andrea urrun dudala gogoratzen dut tarteka bera ikusi ezinak jarri arren triste ta erreta ni bizi banaiz zuregatik da naukazu zorrez beteta; nahiz gorrotozko aztarnak izan nire hondartzan gordeta mareak gora eginez gero dena estaltzen du eta. (Bis)

-5- Zure haizeak jolasti kulunkatzen gaitu ezti; nahiz sarritan jo bortizki askotan ez dator gaizki; nire bizitza zure mendean egongo da segur aski: batetik nire mareak zure eskuetan daude noski, bestetik zara nire bizitza hitsarentzat argi izpi... zu niretzat zer zaren ezin dut oraindik esan zehazki: aldi berean ilargi eta aldi berean eguzki. (Bis)

-6- Zu zara nire etxeko familiaren legeko maitemindu nauzu seko dudak batekoz besteko: gelditu ala lurreratzea bi ideiak bekoz beko; nahiz eta nire familiari izan hainbat errespeto gogo handirik ere ez daukat zure babesa uzteko hau gertatzen zait kaira hurbiltzen hasten naizen bakoitzeko: nire etxetik ateratzea nire etxera joateko. (Bis)

Beñat Gaztelumendi Arandia E kategoria 14 - 16 urte