DONOSTIAKO HIRU DAMATXO

        Anonimoa

Doinua (MIDI) | Partitura (PDF) | Diskografia

        Neskatxatxuak, alegia, naskatxa-txoak, ala... neska txatxuak? Badago zalantza egiteko arrazoirik, Donostia inguruko herrietan bizi direnentzat behintzat donostiarrak berez baitira kaskarinak, txolinak, txoriburuak... Eta, noski, donostiartasunari eransten baldin bazaio neska izatea, ba... erraz dator mesprezu matxista.

        Kantu honen barrenean ageri da Donostiako arrantzaleak gizon txit guapoak direla, eta ez dirudi ironia denik. Donostiar arrantzaleek Errenterian lan egiten zuten neska donostiarrei egindako bertsoak ote? Hala balitz, ez genuke duda handirik egingo zein den benetako bertsioa.

        Hala ere, tabernan «kriskitin-kraskitin» zeinek egiten zuten oso argi dago.

Donostiako hiru damatxo Errenterian dendari,

josten ere badakite baina ardoa edaten hobeki,

eta kriskitin-kraskitin larrosa krabelin,

ardoa edaten hobeki.

Donostiako Gaztelupeko sagardoaren gozoa!

Hantxen edaten ari nintzala hautsi zitzaidan basoa

eta kriskitin-kraskitin larrosa krabelin,

basoa kristalezkoa.

Donostiako hiru damatxo, hirurak gona gorriak.

Sartutzen dira tabernara ta irtetzen dira hordiak,

eta kriskitin-kraskitin larrosa krabelin,

irtetzen dira hordiak.

Donostiako hiru damatxok egin omen dute apostu

zeinek ardo gehiago edanda zein gutxiago mozkortu,

eta kriskitin-kraskitin larrosa krabelin,

zein gutxiago mozkortu.

Donostiako hiru damatxo Errenteriko kalean

egunez oso triste ibili baina dantzatu gauean,

eta kriskitin-kraskitin larrosa krabelin,

baina dantzatu gauean.

Donostiako neskatxatxoak kalera nahi dutenean...

ama piperrik ez dago eta banoa salto batean.

Eta kriskitin, kraskitin,arrosa krabelin,

banoa salto batean.

Donostiako neskatxatxoak mandatuen aitzakian

mutilarekin egoten dira kalean jolaskerian,

eta kriskitin, kraskitin,arrosa krabelin,

pozez algara haundian.

Donostiarrak ekarri dute Getaritikan akerra

kanpandorrean ipini dute Aita Santutzat dutela,

eta kriskitin, kraskitin,arrosa krabelin,

Aita Santutzat dutela.

Donostiako arrantzaleak dira gizon txit guapoak

Gaztelupeko sagardoakin egiten ongi tragoak,

eta kriskitin, kraskitin,arrosa krabelin,

maiz bustirikan ahoak.

Arrosatxoak bost hosto ditu, krabelintxoak hamabi,

Mari Joxepa nahi duen horrek eska bezaio amari,

eta kriskitin-kraskitin, arrosa krabelin,

eska bezaio amari.