Mirakrutz

        Intxaurrondo zaharrean, baina gain honetatik oso hurbil, «Artzak-Ortzeok» elkarte gastronomikoa dago. Bi interpretazio posible: har dezadala dagoena, inori eskatu gabe, self service bat balitz bezala, edo Artzak hor dagoela.

        Hala da, lau pauso eginda gaude Artzak aurrean.

        Dudarik gabe, gure sukaldari nagusiaren jatetxeak egiten du ezaguna inguru hau Donostiaz eta are Euskal Herriaz kanpo. Dotore berriztatutako etxe zaharrean ikus liteke gure hizkuntzaren bilakaera ortografikoa: «Arzac Enea, 1897» eta behean «Arzak».

        Oraindik «Artzak» bilakatu ez bada ere.

        Aurrez aurre, beste espaloian, halako osperik gabe, apal baina garrantzitsu, Lotura Films daukagu, Juanba Berasategiren marrazki bizidunetarako ateliarra.  Lotura, zinemarekin eta euskararekin eduki du beti Berasategiren lanak: Kalabaza Tripontzia eta Ahmed, Granadako Printzea luzemetraiak, Fernando Amezketarra, Lazkao Txiki eta Txirrita telesailak...

        «Constitution Hill» esan izan zioten tropa ingelesek, «Uliako barrioa» esan zitzaion gero, «Alto Vinagres» bezala ezagutu dute XX. mende hasieran jaioek, «Mirakrutz» esaten zaio gaur egun gain honi. Izena, bertatik Santo Kristo ikusten omen zutelako Lezora erromes zihoazenek.