Ua, ua...!

Joseba Zubimendi

Union Radioren lehen euskal irratsaioko agurra

1932-03-04

Ua, ua emendik, otsa,

abill azkar, pizkor, abotsa!

Gure izkuntzan agur laztana,

ludiko euskeldun danorengana,

ortxe dijua.

Ua... ua...!

Eusko erriko anai danori

eman akiok laztan beroa

Bere barrendik irtendakoa

dek gaurko oyua:

Ua... ua...!

Agur esaiok eusko orori,

aberats, txiro, zar ta gaztea,

emaiok azkar, abots nerea,

agur bero bat anai danori.

Ua, ua emendik, otsa!

Napar erriak gaur bere elean

entzungo dik de anaikorra,

joari azkar, abots pizkorra!

An maite aute biotz betean

Bizkai aldeko anai leiala

ire zaik zeok, abots nerea.

Esan akiok izkuntz maitea

berriro pizten ari gerala.

Joari arin, egazka, bizi,

arabatarren biotz erdira

oyu egiñaz: garaiak dira,

ire izkuntza dek lendabizi!

Zuberotarra, ernai dagona,

abil laxterka! ire zai ziok.

Laburdikoaz maitatuz biok

egingo ditek arrera ona.

Mendi, erreka zear or ua

oyuz beteaz bazter guziok;

eusko irrintzi alai dagiok

gure eleko zantzo berua.

Ua... ua!

Itsas barean edo larrian

dabillen eusko arrantzalea

agurtu ezak, abots nerea,

lagun akiok bere lanian.

Agur! esaiok mendi gañean

dagoen eusko artzaitxoari,

itxaropenez azkar joari,

abill abotsa, egiñalean!

Egunsentia ta illunabarra

ikus oi duan nekazaria,

oitura oneko gizon garbia,

agurtu ezak, abots azkarra.

Agur! esaiok seaska ondoan

abots ixillez kutuntxoari,

abesten dion ama onari,

eusko seme bat zeukak alboan!

Aiton zimurra urtean zamak

makurtu duan zar atsegiña

agurtu ezak. Gure alegiña

ta itxaropena eorrek damak.

Ez adi aztu aundikiaren

jauregi apaña barrun sartzea,

ta beartu zak gure elea

miña orotan ibiltzearren.

Ua, ua emendik, otsa,

abill azkar, pizkor, abotsa!

Gure izkuntzen agur laztana

ludiko euskeldun danorengana

ortxe dijua.

Ua... ua...!