Nemesio Etxanizek euskararen premia guztiei erantzun nahi izan zien. Zer ez zuen egin? Dotrina erdaraz ematen zen garai haietan, bertsotan jartzen du Kristau Ikasbidea euskaldun haurrentzat. Edo gutun mordoa argitaratuko du eskutitzak euskaraz idazteko aukerarik eta eredurik izan dezagun. Edo euskara ikasteko metodoak asmatuko ditu. Kanta berriak egingo ditu gazteria erdal kantuek ito ez dezaten. Antzerkiak, irrati-gidoiak, eleberriak, ipuinak idatziko ditu. Eta atxilotuen eta jipoituen kontuak eskatuko dizkio gobernadoreari, behin eta berriz.