|
Toribio Alzaga. Andre Joxepa Tronpeta
IV
Ixkira eta Andre Joxepa Tronpeta
Ixkira: (Potxolo joan den aldera begira) Horiekin aurkitzen banauk, bazekiat zer esan behar dudan: Andre Joxepa Tronpeta, Erreginaren lantzeta! (Ixkira: «Andre Joxepa...» esaten hasten denean, Andre Joxepa Tronpeta ezkerretik sartzen da; eta Ixkirak burua jiratzean ikusten du) Eta, hara bera.
A.J. Tronpeta: Etumetako Basajaun handiak zerorrekin hitz egin nahi omen du, eta, bere aurrera azaldu beharko duzu.
Ixkira: Esan al diozu, Kaxianaren bila etorri naizela eta...?
A.J. Tronpeta: Badaki... Eta, zuk... Basajaun handiaren aurrean aurkitzen zarenean, txapela atera eta begirapen menpetsuarekin egon behar duzu.
Ixkira: (Belauniko eta Aitaren... oso gaizki eginaz) hau ere egin behar al da?
A.J. Tronpeta: Ez: hori, Jaungoikoari bakarrik zor zaion omena da. Baina, ohartu behar zaitut: Basajauna harrabots ikaragarri batekin oihuka hasten bazaizu, isil-isilik, kinkik ere atera gabe egon behar duzula. Orduan zerbait esango bazenio, apurtuko zintuzke.
Ixkira: A zer egosgogorra izan behar duen! Isilik egongo naiz.
A.J. Tronpeta: Goazen bada
(A. J. Tronpeta aurretik eta Ixkira atzetik, ezkerretik joaten dira)
Estalkiak jaisten dira
|
