|
Antonio Amundarain. Lore bat loitan
12garren saioa
Lehengoak eta Atezaina
Ama Frantziska.- Etxeko alaben soina jantziko diogu oraintxe.
Atezaina.- Hona hemen soin berria...
Teresa.- Aspaldian ez bezala estaliko zaitu.
Ama Frantziska.- A! Modestia da hemen lehenengo agindua. (Soinekoa jarriaz). Tira, Karmen, guztien gainetik jarriko dizugu orain, amak ikus zaitzan; gero behar bezala antolatuko zaitugu.... horratx...
Pilar.- Ederki dauka... Hemen erdira ekarri, guztiok ikusi behar dugu. Oso egoki dago.
Ama Frantziska.- Ekarri orain buru-sarea... (Jarriko dio.) Tira, bada... horrelaxe. (Musu emango dio.) Bapo, bapo! Zer deritzozu, Simona?
Simona.- Ondo dago. Pozik egon behar nuke... eta zorionekoa izango nintzake ordu honetan, har gaizto batek bihotza zulatuko ez balit.
Pilar.- Zerk samintzen zaitu, bada, Simona?
Simona.- Ai ene! “inozentziaz” jantzita ikusi behar nuen alaba “penitentziazko” jantziekin ikusi behar...
Pilar.- Garaiz egindako “penitentziak” oker handiak ordaintzen ditu, Simona.
Simona.- Hala beharko.
Teresa.- Etsiko al duzu hemen, Karmen?
Pilar.- Etsiko ez du, bada?
Karmen.- Zuek etorriko zarete noizik behin.
Ama Frantziska.- Etorriko dira... etxean ere badituzu lagun onak... zuk gutxiena uste duzuna bat behintzat... datorrela...
Simona.- Gaiztakerian lagundu dizunen bat noski.
Ama Frantziska.- Gaiztakeria zer den ere ez daki. Etxean dugun aingerurik ederrena da.
Karmen.- Zorionekoa bera!
Ama Frantziska.- Hona hemen zure laguna izan dena eta zure laguna izango dena.
|
