Prestakuntza fisikoa
Minik ez hartzeko, zaindu prestakuntza
Eskiatzera joaten diren zale asko daude Euskal Herrian, baina horretan hasi aurretik oso gutxik prestatzen dute gorputza behar bezala. Eskiak, botak eta beharrezko gainerako materiala hartu eta prestakuntza fisiko berezirik egin gabe joaten dira gehienak eski-guneetara. Baina kirol medikuek diotenez, gutxieneko prestakuntza fisikoa izatea garrantzitsua da eskian nahiko ohikoak diren lesioak ez izateko.
Eskiatzen denean, gihar-multzo handi asko jartzen dira lanean, eta horiek, gainera, lan gogorra egin behar dute.
«Eskiatzen hasi aurretik egin beharreko prestakuntza fisikoa gehien behartzen diren gihar multzoen erresistentzia eta indarra areagotzeko da», nabarmendu du Manu Aramendi kirol medikuak. Zangoen muskulatura, gerria, sabelaldea, bizkarrezurraren hedatzaileak, sorbaldak, bularreko eta lepoko muskulatura dira eskiatzeko orduan lan gehien egiten duten giharrak. Horiexek landu behar dira, beraz, eski denboraldia hasi aurretik. Eta hori bezain garrantzitsua da eskiatzen hasi aurretik ondo berotzea. Hotz-hotzean eskiak jarri eta maldan behera joatea da lesio larriak izateko modurik ohikoena. Derrigorrezkoa da, hortaz, belaunak, gerria, besoak edota lepoa berotzea eskiatzen hasi aurretik.
Ez ahaztu behar bezala jatea
Prestakuntza fisiko egokia eta ekipo aproposa izatea bezain garrantzitsua da ondo jatea, nahiz eta horri askotan ez zaion garrantzirik ematen. Ondo elikatuta eta hidratatuta dagoen gorputzak hobeto egingo dio aurre eskiak eskatzen dion ahalegin fisiko handiari. Eta horrek zerikusi zuzena du segurtasunarekin...
Hala, kirol hau egiten hasi baino egun bat lehenago platerkada bat pasta jatea komeni da. Eskiatu behar den egunean, berriz, ondo gosaldu eta eskiatzen hasi aurretik hiru orduko denbora-tartea igarotzea komeni da. Hona hemen gosari aproposa: laranja zukua, ogi txigortua edo zerealak, yorkeko urdaiazpikoa, arrautzak, gazta edo azken hiru jaki horien arteko konbinazioa.
Eskiatu ondoren, berriz, berdura, entsaladak, patatak, pasta edo arroza jan, karbono hidratoak errekuperatzeko. Arraina edo haragia ere bai, proteinak berreskuratzeko. Eta, bienbitartean, edan ur asko eta jan energia ematen duten produktuak: txokolatea, fruitu lehorrak...
Eskiatzerakoan kontuan
hartu beharrekoak
Eskiatu aurretik...
Prestakuntza fisikoa garrantzitsua da, eta are garrantzitsuagoa kirola tarteka egiten baduzu bakarrik.
- Arineketan edo bizikletaz ibili hankak sendotzeko.
- Indarra eta erresistentzia orokorra hobetzeko, gimnasioan jardun.
- Tarteka, kirol eta esfortzu azterketak egin.
- Eskiatzeko teknika ona ikasi, erorikoek, biraketek edo kolpeek eragindako lesioak saihesteko.
...eta eskiatzerakoan
- Lehentasuna zure aurretik doazen eskiatzaileek dute. Ez jarri horiek arriskuan, eta teleskien lerroan ez eskiatu.
- Abiadura: eskiatzeko abiadura zure gaitasunen, eskiatzeko eremuaren eta ikuspen mailaren arabera egokitu. Eskiatzaile asko daudenean abiadura gutxitu, hasiberrientzako eremuetan, batez ere. Laranja koloreko sarea ikusten duzunean, abiadura gutxitu, arrisku lekua esan nahi du eta.
- Istripuak: istripuren bat ikusten duzunean laguntzera joan. Aspa formako seinalea egin eskiekin, eta eski-guneko sorosleei deitu.
- Geldiuneak: ez geratu edozein lekutan. Beste eskiatzaileak ez molestatu eta jendeak ikusten zaituen lekuetan eskiatu.
- Eski-guneetako seinaleei kasu egin.
- Iraupen-eskia egiterakoan, ibilbideko gezien norabidea errespetatu, baita beste eskiatzaileak ere.
Ohiko lesioak:
- Belauna: gorputz-atal delikatuena da eskiatzeko orduan, etengabe tolestuta dagoelako. Eski-lesioen %87 menisko eta lotailuen okerdurak izaten dira.
- Hatz lodia: bihurdurak, makila eskuari lotuta dugulako. Hatzek makiletan eragiten duten presioaren ondorioz sortzen diren tendinitisak eta artritisak ohikoak dira.
- Burua: hori babesteko, oso ideia ona da kaskoa janztea.
- Bizkarra: gehiegizko kargagatiko mina. Lesioen %38 bihurdurak dira.
- Ukondoa: tendinitisa, gehiegizko kargagatik.
Ekipamendu egokia
- Arropa eta osagarriak: erosoa izan behar du gorputzaren malgutasuna errazteko, hotzerako aproposa, inpermeablea eta izerdiari irten uzten diona. Eskularruak garrantzitsuak dira hotzik ez pasatzeko, eta eroriz gero frenatzeko balio dezaketelako.
- Beharrezko arropa jantzi, ez gutxi, ezta gehiegi ere.
- Eguzkitako betaurrekoak: ezinbestekoak dira, elurrak jasotzen duen erradiazioaren %85 islatzen duelako.
- Eskiak: eman behar diezun erabilera eta eskiatzaile gisa zer nolako maila duzun aintzat hartu erosterakoan. Hasiberria bazara, eski arinak erosi.
- Fijazioak (eskiak eta botak lotzeko): Pisuak, adinak, prestakuntza fisikoak eta eskiatzeko mailak kontuan izan behar dira horiek erosi aurretik.
- Makilak: arinak baina gogorrak.
-Botak: erosoak, albotik zurrunak eta aurretik elastikoak izan behar dute. Orkatila eta oinari behar bezala eustea behar-beharrezkoa da. Ez erosi bota handiegiak, horrek asko handitzen baitu lesio arriskua.
|
| |
 |
 |
|
