Ramon Artola. Sagardoaren grazia eta beste bertso asko

¿Zer egin bear du gizonak, ezkondu edo
gelditu ezkongai?

1 Ezkontzea da gauza txarra eta ona, bizi-bide sekreto aundiyan dagona; gaizki jarri liteke ala ez dagona, bai eta ere ongi len gaizki dagona.

2 Nere konsejuz iñor bear baldin bada, aurregi ezkontzea erokeri bat da; jolas denbora libre pasatu al bada, penatzeko denbora gero ere bada.

3 Lenengo biyotz biz bat egiñik elizan ezkon berriyak gaizki ez litezke izan; bañan ditxak jirarik aizearen gisan, gero dira kontubak munduko bizitzan.

4 Abiyatzen danean aur txikiyen festa, etxean inpernuba billatzen errez da; gabaz lo gaizki egin egunaz orkesta, lengo bizimodurik arkitutzen ezta.

5 Aur bat tronpeta jotzen, negarrez bestea, zarragoa saltoka, txiliyoz gaztea; onela joaten dira jaya ta astea, jolasteko senarra eta emaztea.

6 Oiek mantentzen eta gañera jantzitzen gurasoak eztute gutxi padezitzen, jaio eta dituzten artean azitzen pena ta nekepean dirade bizitzen.

7 Ala ere ez dira palta gurasoak, alkar maitatzen duten amoriosoak; ez izan arren ditxa guziyak osoak, pasatzen dituztenak era-aldi gozoak.

8 Eman zaiogu orain begiyari jira, ezkongai daudenari jartzeko begira; sasoya pasatubak ezpaldin badira, lasai bizi dirala ikusiko dira.

9 Ezkongaya librean arkitzen da oso, ez dauka ezkondubak ainbat estreposo; familiyaren kargik eztu bear jaso, bakarra da, ta bizi liteke eroso.

10 Bañan gaztetan bizi nai dubenak lasa, zartzean dauka beste moduzko jolasa; bakar gelditurikan ez danean gauza, bizimodu triste ta txar bat oi du pasa.

11 Indarrak eskastuta danian debiltzen, gauza sobratu baten gisan da ibiltzen; tristurak bear baña lenago du illtzen, eta nork negar egin etzayo gelditzen.

12 Mundu au negarrezko zelai bat izanik, ezta bizi modurik penarik eztanik; alaz guziaz jira begiai emanik, ezkondubak obeki arkitzen ditut nik.

13 Orra geren aurrean naiko ikuskera, argi biderik gabe arkitzen ezkera; orain iñork badauka ezkontzeko era, zer egin berak bere kontubak atera.