 |
|
|
|
|
X. IRUDIA
EUJENIO GERO LEONTXIO
Eujenio
Ui! eskerrak gora begira dabilela, bestela harrapatzen nau. Roxitagana doa. (Aurreratuaz.) Ez dauka kezka makala zer esaten dion jakin artean.
Leontxio
Eujenio, hire bila nabilek.
Eujenio
Zertarako?
Leontxio
Bazkari on bat elkarrekin egiteko.
Eujenio
Nik herorri bazkalduko haut. Ezer bai al daki?
Leontxio
Dena.
Eujenio
Eskutitza ireki dugula?
Leontxio
Dena.
Eujenio
(Lepotik heldu nahian.) Hator hona, hilko haut!
Leontxio
Orain hago geldirik. Goazemak bazkaltzera eta gero hilko nauk.
Eujenio
Hirekin? Ezta Ezkurrarenera ere! lotsarik gabeko kirtena, zorrez jositako alferra...
Leontxio
(Aterako ditu diru paperak eta berekin joko du ahoan.) Txist...
Eujenio
Oi! Zer dira horiek?
Leontxio
Hauek? Ikus itzak.
Eujenio
Zenbat dira?
Leontxio
Ea, zenbatu itzak, ehunekoak dituk. (Eskuan hartu eta zenbatuaz.)
Eujenio
Ehun eta ehun, berrehun, eta berrehun, laurogeita ehun, eta ehun, hamarrogei eta laurehun.
Leontxio
Aja, ja, ja...! iaioa hago!
Eujenio
Ez, ez gaizki ari ninduan, hago. (Behatzekin zenbatuaz.) Ehun eta ehun (bat, bi) bi ehun eta ehun (bat, bi, hiru), hiru ehun.
Leontxio
Hiru ehun, bai, hiru egun; ondo ari haiz: igandea, astelehena eta asteartea, hik egingo dituan hiru jaiak.
Eujenio
Bai zera! gaur ez noak.
Leontxio
Ez, zera egingo duk. Hemen zaudek lau mila erreal.
Eujenio
Nola arranotan atera dituk?
Leontxio
Hire etxe-jabeak eman zizkidak.
Eujenio
Kristobalek eman lau miloi, edo lau mi-mila erreal?... Zer egin diok bada?
Leontxio
Ezer ez, gaur zegoan xamurra...
Eujenio
Eta bihar?...
Leontxio
Zimurra. Itxi ezak atea eta goazemak Bartolorenera bazkaltzera.
Eujenio
Hoa aurretik, berehala nauk hirekin.
Leontxio
Aurki arte, zain egongo nauk. (Jantziko du Eujeniok zintzilik zeukan zamarra eta haren lekuan jarriko du amantala.)
Eujenio
Nire etxejabea erotu egin da. Niri dirua eskaini, Leontxiori eman, neskaren atzetik hasi... ai, ai, ai!... Horrenak egin du. Nola ote dago orain Roxitaren ondoan... baba dariola. Ai Roxita, Roxita! Ai Kristobal, Kristobal!
|
| |
 |
 |
|
|
|
 |
