|
Lehenbiziko Irudia
Tomax , Roke eta jende pila.
(burtina altxatzen denean, ibiliko da iruditegian jende handia batera eta bestera)
(Tomas, Roke eta kanpotarrak eskuinetik)
(Eresia)
Guziak (koro)
Ederra zara zu, Donosti,
Ederra eta zoragarri!
Alboan, itsaso eta mendi
soro eta zumardi;
bazterrak politak eta txukun
dena lorategi;
inola zerutik jaitsitako
pitxi bat iduri.
Itsasoa marmari
beti, abeslari:
aldiz, haserretsu eta,
aldiz, leun ezti...
txori hegal luzeak
uretan jostari,
muin emanaz halaxe
apar zuriari...
zenbait itsasontzi...
arrantzaleak datoz (datoz)
kaiera bizkorki.
Ederra zara, Donostia,
urre-zilarrez jantzia.
Goazen, bada, goazen, itsasora
Santa Klara eta Kontxara.
Pasaiara...
(Hizketan)
Tomax (Oihuka jendeari) Hona! Hona! Nork joan nahi du Pasaiara? Matxitxakon Pasaiara! Pasaiara! Pasaiara!...? Badoala Pasaiara! Berehala!... (Batzuei eskailera erakutsiaz) Hemendik.
Neskatxa bat Santa Klarara al doa?
Tomax Ez, Pasaiara. (Baporera oihuka) Nahikoak al dituk?... Ondo zagok. (Soka askatuz eta boteaz) To, txikota.
Roke Ederki zoak.
Tomax Bai. Errepara iezaiok aurrean doazen bi emakume horiei. Tarta gainean jartzen diren panpinak ziruditek.
Roke Etorri direnean egon nauk begira. Ez zitean lurrik ere ukitzen!
Tomax Zer jaten ote dute horren arin ibiltzeko?
Roke Ez zakiat nik... Euliak edo txoriak edo...
Tomax Txoriak ez; buru gainean jartzen ditiztek eta...
Roke Orduan euliak. To! Nire emazteari ere hala janarazi beharko zizkioat... Gaur txalupara jaitsi zaidak eta hiru pañel puskatu zizkidak... Eta hori, hanka bakarrean salto egin duelarik.
Tomax Hobe duk, euliak baino, eper bat eman.
Roke Gaitz egiten ziok. (Bapore txikia igarotzen da)
Tomax Maiz jaten al ditu? (Baporea pasa eta txistu zorrotza)
Roke Nola nahi duk, gaitz egiten badio?
Tomax Patrikari?
Roke Non uste huen bada? Haginean?
Tomax Ez al duk gaur txipiroitara joan behar?
Roke Ez; arratsalde guztirako hartua nagok. Jauntxo aberats baten alaba eta beste galai gazte baten zain nagok.
Tomax Aterako haiz?
Roke Zerbait behar diagu guk ere. bezala beti egonean eta alferkerian ez baikara gu bizi! (Eskuinetik ezkerrera bapore txikia igarotzen da. Bapore txistu luzea)
Tomax Mutil; gaur ondo nagok, baporea Pasaiara joan zaidalako; baina bestela, erotzen nauk jende bila. (Joaten da eskuinetik)
|
