1- Emakumeen kirola gizonezkoenera hurbiltzen ari dela iruditzen zaizu?

2- Zure kirolean emakumeak gizonezkoak bezain baloratuta al daude?

Angela Vilariño Automobilismoko gidaria 1- Baietz esango nuke. Kirola praktikatzen duten emakumeak gero eta gehiago dira zalantzarik gabe, nahiz eta oraindik gizonezkoak gehiago diren. 2- Automobilismoan Espainian nahiz Euskal Herrian emakumezkoak ez daude behar bezala baloratuta; jendea ez dago ohituta bolante aurrean emakume bat ikustera. Naroa Agirre Pertika-jauzilaria 1- Aurrerapauso batzuk ematen ari dira, baina gizonezkoen kirolaren aldean oso atzetik gaude oraindik. 2- Zorte handia dut. Atletismoan nesken eta mutilen artean ez dago alde handirik, eta pertika-jauzian ere berdin gertatzen da. Neska eta mutilen artean ia ezberdintasunik ez dagoen kirol bakanetakoa da atletismoa. Ainhoa Murua Triatloilaria 1- Pixkanaka ari gara hurbiltzen, baina oraindik koska handia dagoela iruditzen zait, bai lehiaketetan bai aisialdiko kirolean ere. 2- Triatloia kirol berri samarra da, eta beste kirol batzuekin alderatuz, gizonezkoen eta emakumeen artean ezberdintasun gutxi dago. Baina fitxa federatuei begiratzen badiegu, oraindik neskak askoz gutxiago garela konturatuko gara. Eva Mirones Arraunlaria 1- Kirol guztietan egoera ez da bera, baina oro har, tradizioz gizonezkoenak izan diren kiroletan ez da aurrerapauso handirik ematen, saskibaloian, futbolean edo eskubaloian, esaterako. Oraindik oso urrun gaude kirol horietan. 2- Arraunketa oraindik ere gutxi batzuen kirola da, eta hori nabaritzen da nesken eta mutilen kasuan. Ez dut neure burua diskriminatuta ikusi inoiz.