Bilintxen Menda bertso hamabostaldiaren bigarren edizioan Donostiak historikoki bertso-plaza gisa izan duen garrantzia aldarrikatu, bertsozaleei gozatzeko paradak eskaini eta bertsogintzaren zenbait erpini buruzko gogoeta egingo da.
Bertso txapelketa izango da aurtengo jardunaldiaren ardatz eta lau ekitaldi antolatuko dira: Txapeldunen bertso saioa (5€); Jon Sarasuaren hitzaldia; Bertsolari txapelketen antologia kantatua (5€); eta Gai-jartzailetzaren bilakaeraz aritzeko mahai-ingurua. Sarrerak martxoaren 26tik aurrera jarriko dira salgai.
“Sexberdinak” antzezlanak lortu du Donostiako Udaleko Euskara Zerbitzuak eta Donostia Kulturak antolaturiko 24. Donostia Antzerki Saria. Lan hori izan da 2023an Donostian helduentzako antzerki konpainia profesional batek euskaraz eskainitako antzezlanik onena. Aktore protagonistak Aitziber Garmendia eta Telmo Irureta dira.
Tanttaka konpainiak 12.000 euro eta Aitor Ruiz de Eginoren artelana jasoko ditu sari gisa. Lan irabazlea martxoaren 27an, 19:30ean, eskainiko da doan Victoria Eugenia antzokian. Sarrerak doan hartu ahal izango dira martxoaren 25etik aurrera antzokiko leihatilan.
Oporretan Euskaraz udaleku irekia uztailaren 1etik 26ra izango da. Izen-ematea apirilaren 29tik maiatzaren 7ra aurreikusia dago, eta, apirilaren bukaeran, hemen aurkituko duzue informazio guztia eta eta izen-emate orria.
HABEk, Eusko Jaurlaritzaren Helduen Alfabetatze eta Berreuskalduntzerako Erakundeak, euskara online ikasteko INGURA plataforma digitala jarri du abian. Ikas-plataforma horren bitartez, edozein gailutatik, noiznahi eta nonahi euskara eroso eta malgu ikastea posible izango da.
Euskarazko fantasiazko generoa indartzeko helburua du Oihua! ekimenak. Lan irabazleak Igor Legarreta zuzendariaren aholkuak jasoko ditu film laburra egiteko prozesuan. Horrez gain, antolatzaileek -Donostia Kulturak, Udaleko Euskara Zerbitzuak eta San Sebastian-Gipuzkoa Film Commissionek- 10.000 euro jarriko dituzte ekoizpenerako.
Aritz Olagoik euskara kirolean sustatzeko egindako lanagatik jaso du Kiroletik Bagoaz Euskaraz saria. Sarituak Udaleko Euskara Zerbitzuarekin batera garatu duen KEES (Kirol Entrenamenduetan Euskara Sustzeko) metologia aurrera eramateagatik jaso du Eusko Jaurlaritzak sortu berri duen saria.
2014tik ari dira Donostian KEES metodologia garatzen. 2023-2024an 19 kirol elkarterekin ari dira lanean eta ia 3.000 haur eta gazte ari dira euskaraz entrenatzen.
Donostiako Udaleko Euskara Zerbitzuak urtean bitan antolatzen ditu hiriko merkatariei eta ostalariei zuzendutako euskara ikastaro bereziak: otsailetik ekainera eta urritik abendura. Otsailaren bigarren astean hasiko den ikastaroan izena emateko epea, hain justu, gaur (urtarrilak 15) zabalduko da.
Ikastaroa 60 ordukoa izango dira eta ikasle bakoitzak 60 € ordaindu beharko ditu. Interesdunek online eman ahal izango dute izena www.donostiaeuskaraz.eus helbidean edota aurrez aurre Euskara Zerbitzuaren bulegoan ( Konstituzio plaza 2).
Euskaraz oinarrizko hiztegia ikasteko sakeleko telefonorako aplikazioa da Erraza da eta, batez ere, ostalaritzako langileei bideratuta dago; jatetxe zein tabernetan bezeroei begira lan egiten duten profesionalei. Eusko Jaurlaritzaren eta Donostiako Udalaren elkarlanaren emaitza izan da aplikazio mugikorra.
Udaleko Euskara Zerbitzuak testuak itzuli eta zuzentzeko doako zerbitzua eskaintzen die merkatari, ostalari eta irabazi asmorik gabeko elkarteei. Horretarako eskatzaileek egoitza soziala Donostian behar dute izan eta itzultzeko edo zuzentzeko testuek zabalkunde soziala izan behar dute. Horrez gain, zalantzak argitzeko zerbitzua ere eskaintzen zaie Donostian lanean ari direnei.